सोलुदुधकुण्ड नगरपालिकाको परिचय

सगरमाथा अंचलमा स्थित सोलुखुम्बु जिल्ला नेपालको सतहत्तर जिल्ला मध्ये एक उच्च हिमाली जिल्ला हो जुन हालको सात प्रदेश मध्ये १ नं.  प्रदेशमा रहेको छ । यो जिल्ला मुख्य गरेर दुइ वटा क्षेत्र सोलु र खुम्बु मिलेर नामाकरण भएको हो । यस जिल्लाको सदरमुकाम सल्लेरी रहेको छ यस जिल्लामा एक नगरपालिका सहित सात वटा गाउँपालिका रहेका छन ।  विक्रम सम्बत २०६८ को जनगणना अनुसार यस हिमाली जिल्लाले जम्मा ३३१२ वर्ग किलोमीटर छेत्रफल ओगटेको छ र जनसंख्या १०५८८६ रहेको छ । नेपालकै प्रमुख पर्यटन केन्द्रको रुपमा रहेको यस जिल्लामा संसारकै उच्च सर्बोच्च शिखर सगरमाथा(८८४८ मिटर) रहेको छ । संसारका विभिन्न देशबाट पर्यटकहरु बिदा मनाउन तथा पर्वतारोहणका लागि यस क्षेत्रमा आउने गर्छन । यसका साथै UNESCO ले सगरमाथा राष्ट्रिय निकुञ्ज क्षेत्रलाइ विश्व सम्पदा छेत्रमा सुचिकृत गरिसकेको छ । नाम्चे बजार सगरमाथाको मुख्य प्रवेश मार्गको रुपमा रहेको यस क्षेत्रमा शेर्पा संस्कृति, त्यांग्बोचे गुम्बा, सगरमाथा आधार शिबिर आदि पर्यटन व्यावसायका मुख्य आधारशिला हुन् ।

सोलुखुम्बु जिल्लाकै पहिलो नगरपालिका तत्कालिन बेनी, लोदिंग, तामाखानी, सल्लेरी र गार्मा गा. बि. स. मिलेर दुधकुण्ड नगरपालिकाको स्थापना बिक्रम सम्बत २०७१ मंसिर १७ गते भएको थियो । पुर्वाञ्चल विकास क्षेत्रमा रहेको यस नगरपालिका २७° ३०′ १६″ उत्तरी अक्षांश र ८६° ३५′ ११″  पुर्बी देशान्तरमा अवस्थित छ । तत्कालिन नगरपालिकाको क्षेत्रफल २५४.३ वर्ग किमी रहेकोमा मिति २०७३ साल फाल्गुन २७ गते तत्कालिन टाक्सिन्दु, केरुंग, गोराखानी र टापटिंग गा. बि. स. समाबेश भई सोलुदुधकुण्ड नगरपालिका कायम रहेको छ । २०६८ सालको जनगणना अनुसार यस नगरपालिकाको जनसंख्या २०३९९ र क्षेत्रफल ५३८.०९ वर्ग किलोमिटर रहेको छ ।